قبل ما أبدأ في توجيه الرسالة اللي هي عبارة عن كلمتين واقفين ف زوري نتيجة مواقف بتحصل قدامي بقالها مدة كنت عاوز اناقش نقطة لفت انتباهي ليها انسان عزيز عليا وهي ان اعظم عبادة عندنا في ديننا هي التضحية لو جينا بصينا للعبادات عموما هنلاقيها بتقوم على التضحية ....
وأعظم العبادات أجرا هي العبادات اللي بيكون فيها عنصر التضحية باين أوي و في منها عبادات احنا منعرفش أجرها أو ربنا خص نفسه بمعرفة أجرها ... كرامة للقائمين بها وترغيبا في القيام بها عبادة مثلا زي الصيام ربنا قال : "كل عمل ابن ادم له إلا الصوم فإنه لي وأنا اجزي به " حديث قدسي .... الزكاة مثلا ... حد يقدر يقول أجر الزكاة من الحسنات كام ... الحج علشان فيه تضحية متنوعة لو مبرور ... ليس له جزاء الا الجنة !!.....
تعالى بص بقى للصلاة الصلاة اكتسبت عمود الدين ليه ؟؟؟ الصلاة ... تضحية بالجهد البدني ..... ماتقدرش تاكل ولاتشرب وانت بتصلي "زي الصيام" ماتقدرش تشتغل وتكسب فلوس وانت بتصلي "تضحية مادية" ......
نيجي نبص بقى لعبادة زي الجهاد اكتسبت ذروة سنام الاسلام ليه ... لأنك بتضحي بأغلى حاجة عندك وهي نفسك وبتقدمها لخدمة الله ولرفع كلمة الله .... تمام ...
يبقى مقام كل واحد فينا عند ربنا بمقدار تضحيته لدين الله و على قد ما هيقدم على قد ما قدره هيكون ,,,,, وبما ان المفروض لو احنا ناس محترمة يبقى قدر الناس عندنا هيكون بمقدار اتباعها لأوامر ربنا وتقواها "الظاهر لينا طبعا " يبقى لو واحد قام بواجبه وباين انه بيضحي "بيقوم بعباداته يعني بشكل سليم وبيتقي الله في أفعاله وأقواله " دة المفروض يتشال على الراس .... واحد تاني مقصر في اداء الحقوق دي ... مابقولش نهينه .... بس المفروض ياخد القدر اللي يستحقه برضه .... اللي يغيظك بقى انك تلاقي واحد مقصر ... وبيطالب بإن الناس تعطيه حقوقه كاملة .... طب ازاي وانت مقصر في حق نفسك وف حق اللي حواليك ....
من كام يوم سمعت ف مواصلة واحد بيتكلم مع واحد تقريبا مزعل والده وبيحاول يهديه ومع اني مكنتش متابع بس صوتهم كان عالي .... الراجل واضح من الاخر انه غلط ف حق ابنه جامد واهانه والتاني اللي بيهديه عارف ومقتنع بده واللي طالع عليه ... "معلش مهما عمل ومهما سوى دة أبوك "...... الكلمة دي الصراحة هي مخلياني دلوقتي أكتب الكلام دة .... الاعتراض هنا مش على ان الواحد يسمع كلام الاب ولا يعصيه ولا كذا ولا كذا .... النقطة هنا لما جه واحد راح يشكو عقوق الابن لسيدنا الفاروق عمر بن الخطاب واستقصى خليفة المسلمين عن الموضوع لقى ان الاب ماحفظش ابنه القرءان واختار له أم سيئة وسماه اسم وحش!!! وهنا كان الرد العمري الصريح : لقد عققته قبل أن يعقك !!!
السؤال اللي دايما محير ... ليه الجيل الحلو الظريف اللي فوقنا دة منتشر الموضوع دة في قطاع عريض منه وبشدة ؟؟؟؟ ليه الأب لما بيجي يكلم ابنه تحت أي ظرف بيستبعد أي تقصير من جهته وما بيبقاش قدامه الا الجزء من الاية القرءانية اللي بيقول " ولا تقل لهما أف" صدق الله العظيم ؟؟؟؟ ما بيسألش نفسه للحظة هل انا قمت بحقوق هذا الانسان اللي انا كنت سبب في قدومه للدنيا دي ؟؟؟؟ دة ممكن يكون قايم بعكس اللي النبي أمر بيه مع الانسان دة من طفولته ..... أبسط مثال ....
كام طفل ف مصر لما كان بيغلط أول رد فعل تجاهه كان هو ضربه بالقلم على وشه !!!! "النبي الكريم نهى عن ضرب الوجه "!!!
هل عمرنا سمعنا ان النبي الكريم ضرب الحسن او الحسين رضي الله عنهما او حدث دة من سيدنا علي كرم الله وجهه ؟؟؟ ما سمعناش عن الكلام دة ... وطلعوا ماشاء الله رجالة وكفاية انهم سيدا شباب أهل الجنة وكفاية سيرتهم اللي تعلمنا ازاي نكون رجالة !!! .....
ربنا من فوق سبع سماوات شهد لنبيه الكريم صلى الله عليه وسلم بإن لينه وطيب خلقه سبب من اسباب انتشار الاسلام " ولو كنت فظا غليظ القلب لانفضوا من حولك " صدق الله العظيم ... عمرنا ما سمعنا ان النبي الكريم اتبع اسلوب الجبر والقهر والاكراه مع اي حد من صحابته بالعكس حينما كان بيحب يحمل حد على فعل من الافعال كان بيجيبه ويشرح له الصح ليه وايه اللي يخلينا نعمل الصح وايه ثوابه وازاي دة هيرفع قدرنا عند ربنا وعند الناس ... ساعتها مش هيكون قدامك حل الا انك تعمل الحاجة وانت مقتنع بانها صح ومكسوف من عمل الغلط .....
تعالى بقى بص ... طبعا الجديد عندنا!! ....ايه اللي يخلي طفل مجبر انه ينفذ كلام أبوه حتى لو مش مقتنع او مش عاجبه ..... عد معايا ... عشان كبير عنه وفاهم ... عشان هيزعل منه ويخاصمه ... عشان هيقطع عنه المصروف .... عشان هيضربه ...... ولو منفذش هيبقى عاق وزنديق وزنبوخ .....
الملاحظ هنا انك لو سألت حد من الناس دي وهو مقصر ف حق عياله .... انت جايبهم ليه؟؟؟ يضحك ضحكة حلوة اوي ويقولك ايه ... مالكش نفس تقعد ف البيت كدة متجوز وتجيب عيل عشان يقولك يابابا ؟؟؟؟ والله لو على كلامك .... المفروض من أول ما الواد ينطق ويقولك يابابا ماتطلبش منه حاجة وتعمله كل حقوقه من غير أي طلب تاني ... لأنه خلاص قالك يابابا !!!
لكنه كمان بعد ما بيخلفه تحس ان الناس دي بتشتق نوع من العبودية من الاية "ولاتقل لهما أف" عاوز ابنه عبد حبشي عنده يمين يمين ... شمال شمال ..... طيب هنفترض جدلا ان الطفل دة عبد عندك وان في عبودية لله وعبودية لسيادتك انت استنبطتها من الاية دي .... ايه التمن اللي دفعته ؟؟؟؟ تعبت وجبته بتعب أو مرض ؟؟؟ محصلش .. دة انت جايبه بمتعة !!!!
أكلته وشربته و ووفرتله مكان ينام فيه .... يبقى كدة الملجأ بقى أب !!!
الأب يا سيدي الفاضل كيان ومقام نفسي قبل ما يكون مقام وكيان مادي .... الأب هو اللي يفضل يدل ابنه على الطريق لربنا لحد ما ييجي اليوم اللي ابنه يدله على طريق ربنا ..... الأب هو اللي ما يستكبرش يقعد قدام ابنه ويسأله ويستفهم منه عن موضوع هو عارف ومتأكد انه فاهمه اكتر منه ..... الأب هو اللي يربي سبع سنين ويأدب سبع سنين ويصاحب سبع سنين وبعدها ينصح بس ... دة اذا احتاج ينصح لأنه لو عمل دة بما يرضي الله ابنه هيطلع عارف سكته !!!
لازم تعرف قبل كل حاجة ان ربنا ادالك الطفل دة عجينة ... انت هتشكلها وتنتج منها انتاج حلو يفيد نفسه ومجتمعه ... لأنها اصلا خامة حلوة ربنا خالقها فطرتها سليمة على الاسلام وبريئة .... ماتجيش انت بقى بإيد مش نضيفة وغير متمرسة وتشكلها بدون معرفة اساسا عن كيفية التعامل معاها ومكلفتش نفسك اساسا تتعلم ازاي تتعامل معاها وتنتج ف الاخر طوبة ناشفة بايظة وتقول اصل العيب ف الطينة !!!!
والسلام ختام
تمام جميله جدا
ردحذفوفعلا الاب قبل ما يحاسب ابنه يحاسب نفسه
مش شرط الاب بس هي فكرة انك قبل ماتدور على حقوقك ... قم بواجباتك !!!
ردحذف