مش عارف أنا بكتب البوست دة ليه !!... ومش عارف بكتبه لمين ولا عن ايه !!!..... ومش عارف حاسس ليه إني عاوز أزعق واشخط وانطر فيه !!!... مش عارف ايه اللي مزعلني ومكدرني كدة .... مش عارف ليه الدنيا مش راضية تظبط .... مش عارف لامتى هنفضل دايما بنختار اختيارات مش بتاعتنا ... والادهى من كدة بنقتنع انها اختياراتنا ..... مش عارف لامتى هيفضل قطاع كبير من الشعب عقله ف ودنه .... ومهما اقنعته بالصح وكلمته بالراحة برضه مابيسمعش .... مش عارف لامتى هنفضل نخاف من مواجهة الغلط ونقعد نلف وندور حواليه زي مايكون هو الحق واحنا بنطوف حواليه ..... مش عارف لامتى هنفضل مخرجين ربنا برة حسبتنا وكأننا احنا اللي بنعمل كل حاجة ... سبحانك يارب .... مش عارف لامتى هنفضل نتشدق بشعارات ومبادئ وكلنا عاملين فيها أحسن ناس ف العالم لكن في أبسط المواقف بيبان أوي قد ايه احنا صغيرين أوي قدام نفسنا ومبادئنا ... مش عارف لامتى هنستنى حد يحل مشاكلنا وكأنه معاه العصى السحرية اللي بكلمة وقرار كله هيتظبط ....طب وليه تستنى كلمة من حد مادمت انت عارف انه صح ... ولا هو في صح بيخالف اللوائح والقوانين ؟؟؟!!... مش عارف لامتى كلنا هنبقى فاهمين ف السياسة والكورة والطب وكل واحد بيفتي في أي حاجة مش من تخصصه في حين ان ممكن تكون معلوماته عن تخصصه زي معلوماتي عن دورة حياة الكنغر ؟؟.... مش عارف لامتى الانسان المصري هيفضل مقتنع ان في حد بيفكر أحسن منه أو بيفهم عنه ... مع ان عنده نفس المقومات بس الفرق ان دة بيستغل مقوماته ودة منيمها من المغرب !!!... مش عارف لامتى هنفضل نستنى المصايب عشان نبتدي نحط خطة طوارئ أو خطة تعامل مع الكوارث ... مش عارف لامتى هنفهم ان الاختلاف في الفكر او الاراء أو المذاهب الفكرية لا يعني العداوة بالضرورة !!! مش عارف هل ف يوم من الأيام العلم فعلا هيتقدر عندنا ولا هيفضل دايما متكدر ؟؟؟ وامتى هنكرم علماءنا قبل ما يكرمهم الغرب ؟؟؟.... مش عارف امتى هنعرف ان الدين هو أقدس اعتقاد على وجه الارض واغلى حاجة عندنا واننا لازم نحترمه ومش كل من هب ودب يفتي فيه ؟؟؟.... وف نفس الوقت مش عارف لامتى هنفضل نتطاول ع الناس علماء أو غير علماء بس دايما علماء الدين بيكون ليهم النصيب الاكبر من السب والشتيمة .... مش عارف لامتى هنفضل نقول على الصح تشدد وع الغلط والتسيب وسطية !!! مش عارف لما أنا مش عارف الكلام دة .. عايش ليه ولا هعرفه امتى ؟؟؟؟ ومش عارف هفضل لامتى أقول مش عارف !!!
يومكم بيضحك أو بيعيط ... مش عارف !!!!
يومكم بيضحك أو بيعيط ... مش عارف !!!!
تصدق انا كمان مش عارفه :D مقاله جامده بجد حيرت الواحد وخلته يسأل نفسه فعلا احنا ليه كدا.....
ردحذفsara elsherbiny