أنا وما عدايا ..... خرفان !!!!

أيام ما كنا بنقول للناس انتخبوا مرسي عشان شفيق وحش وابن ستين كلب .... كنت تبص تلاقي ناس غريبة جدا ... وجهة نظرهم الصراحة مع انها منتشرة بس كنت دايما بشوفها من أغرب وجهات النظر ف رفض مرسي وهي ايه : انا مش هنتخب مرسي عشان مرسي بدقن وهيخلي الناس تتحجب بالغصب وهيبقى حكم اسلامي و البقين اللي كلنا عارفينهم دول ..... الاجمد من كدة بقى ان وجهة النظر دي لم تقتصر على مؤيدين البلوفر بس ولكنها تعدت ووصلت الى مؤيدين مرسي كمان ... كان يقولك ايه .... زي ما كان بيتقال أيام البراعي بالظبط كدة البرادعي هيقلع أمك الحجاب .... كانو بيقولوا الشفيق هيقلع أمك الحجاب ووهينزل أختك عريانة ف الشارع .... "مع اني مش مختلف معاهم الا ف نقطة ان شفيق كان هيخلي مصر كلها تقلع كل حاجة وكنا كلنا هنمشي ف الشوارع عرايا" لكن اللي مش قادر أفهمه ... هو ليه دايما بنحول القضايا كلها لايمان وكفر ؟؟؟؟ ليه اللي مش معايا عطول يبقى ضدي ؟؟؟؟  يعني مثلا المواطنين الشفيقين .....هنسألهم : ايه اللي يخليك خايف من ان البنات تلبس حجاب أوي كدة الا لو انت بتحب المليطة ايه اللي يخليك تخاف من ان الحرامي ايده تتقطع أو الزاني يتجلد أو أو الا لو كنت حرامي أو زاني أو أو ....... ما تجيش تغني عليا بقى وتقولي حقوق الانسان ومش عارف ايه ...... انت بقالك أكتر من سبعتلاف سنة حقوق انسانيتك بتنتهك ... بس حب الزيطة بقى بعيد عنك !!!!!

نيجي بقى ونبص على الاخوة اللي بيقولك احلق هيقلع أمك الحجاب ..... أعتقد ان لما أمك تقلع الحجاب يبقى المفروض أمك تقلعه من هنا وانت تلبسه من هنا ..... انا هنا فعلا شايف الاتنين غلط الموضوع مكانش له دعوة بمؤمن وكافر الموضوع كان له علاقة بحق وباطل بظلم وعدل ..... النقطة اللي لفتت انتباهي هنا ان كل واحد بص لنفسه بس .... سواء اللي قال شفيق او اللي قال مرسي .... كله كان بيقول على التاني حمار ..... ما عترضناش بس الفكرة الل خايف من انه يلبس الحجاب بالعافية ماعندوش أدنى مشكله من ان غيره يقلع الحجاب بالعافية ... طبعا مش بقول ان دة كان هيحصل بس بصولها كدة من الناحية اللي انا شايفها منها هتكتشفوا  كمية أنانية في الحوار دة بنت لذين طيب ليه كدة بقى ؟؟؟؟؟ ليه ما يبقاش في عندنا اعتقاد بإن اللي بيخالفني ف الرأي دة انسان وبيفكر ..... ممكن يكون تفكيره غلط بس دة ما يديش أي حد الحق في انه يسلبه حقه ف التفكير أو الممارسة لعقيدته وشريعته .... طبعا انا عارف اني بهري ف اي حاجة بس الصراحة يعني كتر الكلام ف الموضوع دة وكل ماتكلم حد يحسسك انك لو مش معاه تبقى ضده وطالما انت ضده يبقى انت مابتفهمش حاجة وحمار .... خنقتني جدا ...... ومعدتش طايق الحكاية دي ..... وللكلام بقية !!!