الظاهر ان المجلس العسكري أول ما مرسي مسك الحكم كان مقتنع تمام الاقتناع بإن محمد مرسي مش متعود يفكر بتفكير أهل الأرض " نظرا لأنه راجل طول عمره بيتعامل مع الفضائيين " مش عارف ليه حسيت الاحساس دة وأنا بعيش أول أيام تحت حكم محمد مرسي .. الراجل أول مامسك مكنتش عارف هو بيعمل إيه ليه .. ف الميدان "لابد للجيش من العودة الى ثكنانه " وف الهايكستب " لابد أن يساهم الجيش في حفظ الأمن الداخلي " بس اللي ضايقني فعلا حكاية تكريمه لفاروق سلطان دة .. المهم .. المجلس كان بيلاعبه بطريقة فعلا الوحيد اللي ممكن مايفهمهاش هو الكائن الفضائي .. اعلان دستوري مكمل بيدي الجيش سلطة تشريعية بعد حل مجلس الشعب .. حق المجلس ف الانعقاد تحت أي ظرف مادامت ظروف البلد تستدعي ... اومال هو جاي يعمل إيه .. كدة التعديل اللي بيحصل ف حياة مرسي هو مجرد تغيير محل اقامته ف البطاقة للقصر الجمهوري فقط !!! ضيف على كدة بقى الفترة اللي قضاها محمد مرسي اول كام يوم في صمت بدون أي قرار ...خلت الناس شبه تتأكد ان الريس طلع المحطة الدولية ف الفضاء وكلها أربع سنين وراجع تاني ... بس ان كان محمد مرسي الصراحة رجع مجلس الشعب بغض النظر عن اللي كان بيحصل فيه الا ان أي قرار يكسر مناخير العسكر أنا معاه فيه فوق أي أرض وتحت أي سماء بعد الذل اللي شفناه على مدار الستين سنة اللي فاتو .... بس برضه فيه شوية حاجات كدة عملها منرفزاني وبتخلي الواحد هاين عليه يقطع ف شعره كل ما يفتكرها .. أولا فين ياريس اخواتنا اللي مرميين ف المعتقلات ... بقى يوم ما نشكل لجنة عشان تجيبلك معلومات عنهم تشكلها من الكلاب اللي سجنوهم ؟؟؟ كنت قوللي وأنا أجيبلك مبدأيا سبع تلاف اسم بعناوينهم .. بتواريخ قضاياهم ... بس دة هيقودنا للنقطة اللي هتخليك تولع ف شعر راسك ... فين الحكومة ياريس .... يعني احنا هنمشبها تاتا تاتا انت المفروض واحد جاي تمسك رئاسة يعني المفروض طول حملتك الانتخابية بتظبط في فريقك اللي هيساعدك دة ان كان في مشروع نهضة فعلا زي ما بتقولوا ...كان المفروض نظامك و ناسك وحكومتك تكون جاهزة على التركيب زي ما بيقولوا ... كان المفروض تبقى جاهز يا ريس ....!!! بجد قفلتني !!!
ليست هناك تعليقات:
إرسال تعليق