حاوريني يا طيطة

تابعت امبارح خطاب السيد الرئيس محمد مرسي على قناة النيل للأخبار ....في شوية حاجات لفتت نظري ف الخطاب ... طبعا بعيدا عن شخص الرئيس لأن هنا مش مكان نقد اشخاص وانما مكان لنقد الفكر والفعل .....

أولا السيد الرئيس حصر الثورة المصرية في 18 يوم

بس ودة خطأ لن الثورة المصرية استمرت على مدار السنة الماضية بجميع المليونيات ومرورا باشتباكات محمد محمود ومجلس والوزراء وأخير العباسية

ثانيا السيد الرئيس حينما حاول عرض ومناقشة مشكلة كمشكلة التعليم ... تفادى أو تناسى او لم يذكر أسباب المشكلة ولا حجم المشكلة وابتعد عن الارقام كل ماذكر من ارقام في هذه المشكلة هو قوله عدد العاملين ف المجال التعليمي22مليون وعدد المتعاملين مع المجال التعليمي 60 مليون تقريبا ناهيك عن عدم ذكر حجم المشكلة او حجم التمويل

انما اكتفى بذكر أن حل المشكلة يكمن في مضاعفة ميزانية التعليم في مصر "بدون أرقام" ويناشد أصحاب مدارس القطاع الخاص تخفيف المصروفات عن كواهل أولياء الامور " قال يعني هيخفضوها عشان خاطر الريس" وبالنسبة لتطور مناهج التعليم " الخطط موضوعة ويتم بحثها وستنفذ ان شاء الله " فين الوقت ؟؟؟؟؟

ثالثا : كلما سئل السيد الرئيس عن مشكلة ... اجاب ان الحل في الانتظار لحين الوصول لأليات الحلول ويجب أن نتحمل سويا "ليس كل الوقت ولكن لبعض الوقت " كلام جميل ولكن أنا اتحمل وانتظر حينما تكون امامي مشكلة او مشكلتان عاجز عن حلهما وابحث عن الاليات ولكن حينما تكون كل مشاكل الوطن قيد الانتظار وقيد الحل ..... بالبلدي "أومال احنا بنعمل ايه بقى " ؟؟؟؟ هل عدنا الى الروتين الحكومي و"فوت علىنا بكرة يا سيد" ........


رابعا : السيد الرئيس قال عن تصنيف المشاكل وعن المئة يوم وخطته أن هذا كان تصنيفا نوعيا "عذرا سيدي لم أسمع هذا ابان حملتك الانتخابية !!!"

خامسا : المحاور كان يفتقر الى مهارة الحوار واستخراج المعلومات ... فكأنما هو الة قذف اسئلة تم وصعها امام الرئيس يقذف السؤال فيتلقفه ويجيب عليه ... ربما تكلم أثناء الحلقة لأقل من اربع أو خمس دقائق !!!

سادسا : اخر ملحوظة ..... كان ينتظر من استاذ جامعي له خبرة في عرض الافكار ... وله خبرة في التعليم ومناقشة المشكلات وحلها ان يقوم بعرض كل مشكلة على حدة بالارقام موضحا المعطيات وموضحا الاليات المستخدمة للحل في نقاط ..... ثم يوضح الناتج عن استخدام هذا الحل بالارقام أيضا ولكن هذا لم يحدث !!!! .....

شكرا ..... وقدر الله وما شاء فعل !!!!!

                  

مش قادر

مش قادر !!!!

مش قادر يتكلم ومش قادر يعبر عن اللي جواه .... مش قادر يقول هو نفسه ف ايه مع ان اللي نفسه فيه مش عيب ولا حرام !!! .... مش قادر يكتب حاجة هو نفسه فيها  على فيس بوك أو تويتر لمجرد انه مش عاوز الناس تعرف انه نفسه ف كدة او لمجرد الخوف من الناس تاخد عليه تفكيره دة كعيب أو حرام مع انه لا عيب ولا حرام بس هو بيهتم بمشاعر ناس يمكن ف أوقات كتير مش بيهتموا بمشاعره أو يعتقدوا ان ليه مشاعر من الاساس !!!!
مش قادر يقول انه متضايق من فلان عشان حركة النقص اللي عملها معاه .... ومش قادر يقول انه فرحان بإن فلان الفلاني بدأ يمشي ف السكة الصح في حياته بعد ماكان ماشي غلط ..... مش قادر يقول انه متضايق من مراته أو خطيبته وانه بيحن للحظة واحدة من اللحظات اللي كان بيقضيها مع حبيبته الاولانية ... مش قادر يقول انه عايش حياته مجرد تقضية واجب لناس هو مجبر على ارضائهم لأنهم اتعودوا منه على كدة وعند اول تغير ف شخصيته بينقلبوا عليه وبيقلبوا حياته جحيم ..... هو اه ضعيف ..... اه منعدم الشخصية ف نظر ناس كتير لكن من وجهة نظره هو طريق واتفرض عليه ولازم يمشيه لاخره !!!

بس الفكرة ف اخر الطريق هيلاقي ايه ؟؟؟!!!!                                        

المريض قبل الطبيب

من أول شهر أكتوبر بإذن الله هيبدأ اضراب الاطباء ناس كتير هتقول ان الاضراب دة مش صح او أن الطب مهنة سامية لا يجوز معها الاضراب ..... مهم جدا ان الناس تعرف ان الاضراب دة لمصلحتهم قبل مايكون لمصلحتنا .... احنا ما بنطالبش بحاجات كتير ولا حاجات مستحيلة .... الموارد موجودة اللي ناقصنا القرارات اللي تستخدم الموارد دي !!!

*الاضراب مش معناه ان المريض يموت ... بالعكس اقسام الطوارئ والعناية المركزة هتبقى

شغالة طول مدة الاضراب وبالمجان ....

*الناس اللي بتاخد ادوية مزمنة زي الضغط والسكر وبتصرفها من الوحدات الصحية هيتم صرف أدويتها من الوحدة عادي خالص ..... زي ماقولت الاضارب دة لمصلحة الناس قبل مصلحة الدكاترة لو شوفنا مطالب الاضراب هنلاقيها كالاتي :

1- تأمين المستشفيات الاتأمين اللازم واللي يكفل الامن للمريض قبل الدكتور من هجوم البلطجية والناس اللي ما بتعترفش لا بقانون ولا دين لدرجة انها تدخل تتعدى على ناس بتعالج ناس مريضة وعاجة أثناء عملها

2- زيادة ميزانية وزراة الصحة الى 15%: لأن كل الحكومات بتنظر الى وزارة الصحة كوزارة خدمية

(مصدر لصرف الفلوس ومش بتجيب فلوس) بالتالي بيتعمدوا تقليل الميزانية بتاعتها
لما تزيد مزانية وزارة الصحة هنعرف نعالج المريض صح وهنعرف نقدم خدمية طبية على الاقل محترمة بتحترم ادمية الامريض !!!

3- تطبيق كادر الاطباء : بحد أدنى 3000 جنيه لطبيب التكليف وتزيد مع تدرجه في السلم الوظيفي وبرضه زيادة المرتبات لكافة العاملين في القطاع الصحي بما يكفل لهم حياة كريمة دة هيخلي الطبيب مركز أكتر ف شغله مش طول الوقت بيدور على اي شغل خاص عشان يعرف يغطي احتياجاته سواء لو متجوز أو لو بيحضر دراسات عليا

لازم الناس تاخد بالها ان اللي واقف ضد الاضراب دة هي الناس صاحبة المرتبات العالية والمكاتب الفخمة ف وزارة الصحة وللا سف بعض الدكاترة من أصحاب العيادات ذات الدخول العالية و كتير جدا من اصحاب المراكز الخاصة اللي يهمهم أوي تدني خدمات وزارة الصحة عشان يفضل مورد مهم جدا من موارد دخلهم شغال

وفي الاخر أحب أٌول لو ان الطب فعلا مهنة سامية ولها التقدير والاحترام يبقى الواجب علينا ان احنا نقدّر اللي بيمارسوها الاول مش نهينهم ونمسح بكرامتهم الارض ..... وشكرا

الرجولة مواقف !!!! والشعلقة دلدقة !!!!

بالنوسبة للموضوع بتاع الضباط الملتحين دة في كلمتين واقفين ف زوري الصراحة ...... هو اه حقهم انهم يربوا لحيتهم و حق اي حد ف البلد حقه يربي لحيته ..... بس سؤال بيطرح نفسه وبشدة الصراحة  كان فين حب الدين و العمل لدين الله والجرأة المتناهية دي في تربية اللحية وعدم الرجوع عن القرار أيام المجحوم بإذن الله حسني مبارك ؟؟؟؟  كان الواحد فيهم بيخاف من ان حد يشوفه مشغل قناة القرءان ف استراحة الظباط ف القسم !!! يتكتب فيه تقرير متين لأمن الدولة وكان الله بالسر عليما دلوقتي الواحد فيهم ماشاء الله فاتح صدره وزي الفل ...... اللي يلفت النظر هنا ان الرتب اللي بتعمل كدة جزء منها رتب كبيرة ..... طب انتو كنتو فين ؟؟؟ لو هنقول جيل الثورة المسلم المفروض اللي يعمل كدة ملازم أول نقيب بالكتير ... انما ماشاء الله مرة واحدة كدة كل القيادات ربنا بيهديهم واحنا عارفين الناس دي كان شغلها بيتضمن ايه ....... ربنا يهدي ماشي بس برضه السؤال انتو كنتو فين وكانت فين الجرأة دي ..... حاجة من اتنين :

الحاجة الاولى انك فضلت لقمتك ولقمة عيشك واقتنعت ان اللي بيقبضك دة سيدك وهو اللي بيأكلك ويشربك وخفت تاخد موقف وتدافع عن حاجة انت مؤمن بيها وشايفها جزء من دينك

الحاجة التانية : انك فضلت تسكت لأنك قال انك تخدم ربنا ف موقعك وتدفع عن اخواتك المسلمين اللي بيتقبض عليهم وتحافظ عليهم وتبعد عنهم الاهانة ..... ولكن على حد اعتقادي دة محصلش !!!

بالتالي مفيش مواقف عشان تبقى رجولة واللي بيحصل دة ماهو الا شعلقة وهتؤدي للدلدقة اللي توقعناها فوق

طبعا كون انك تكون خايف مش عيب بس العيب انك تدعي الشجاعة ..... وف الاخر قال رسول الله صلى الله عليه وسلم : أشد الجهاد كلمة حق في وجه سلطان جائر ...... صدق رسول الله  السؤال النهائي انت ماقولتش كلمة الحق ف وجه السلطان الجائر ليه ؟؟؟؟؟


قلم مقصوف ツ