اضحك يابن المتضايقة !!!

من أول ما بدأ رمضان وانا مش عارف اتلم على فكرتين أكتبهم ..... يا إما تعبان ونايم .... يا أما ف الشغل ومسافر .... وبما اني دايما بأكد على حقيقتين ف الحياة هما :

1-ان الانسان حيوان كاتب مفكر 

2-الحقيقة التانية ان الانسان حيوان ضاحك 

بالتالي لازم نعبر عن نفسنا يا بالكتابة يا بالضحك ...... وبما ان الضحك تقريبا شح ف السوق ولم يعد من البكاء بد !!!!! بالتالي معدش قدامنا طريقة نبعبر بيها عن نفساويتنا الا الكتابة والتفكير وبعد طول التفكير وعدم الكتابة جه ف بالي سؤال ... بما ان انا بحب الضحك أكتر من الكتابة الصراحة !! "عشان أسهل يعني ومش مكلف لا بيكلف فلوس عشان توصله للناس ولا بيكلف عمر لما تتسجن عشان انت وصلت اللي انت كتبته للناس"  ومن هنا من مبدأ ليه ممكن تكتب لما ممكن انك تضحك !!  كان لازم أسأل ... احنا ليه بطلنا نضحك ؟؟؟!!! سؤال قديم ومهروس ف ألف حلقة من البرامج اللي بيطلعوا يمثلوا علينا فيها انهم بيتناقشوا فيها "بما في ذلك جلسات مجلس الشعب" بس ف الاخر بعد الفرجة ع البرامج دي بتحس انك تايه أكتر ... مش عارف تفهم أو مش عارف ازاي تفهم أصلا .... اللي يغيظك بقى انك تروح الشغل تاني يوم تلاقي واحد من الناس ف الشغل عمال يهري ف الحلقة بتاعة امبارح اللي هو شافها وازاي كانت حلقة جامدة وانت واقف عاوز تقوله : " مراتي طالق لو انت كنت فاهم حاجة " ... المفاجأة هنا ان المفروض انك تضحك ف موقف زي دة بس برضه ما بتضحكش !!!!

المواقف اللي بتحصل ف حياتنا وتخلينا نضحك كتير بس الفرق هنا حاجة واحدة ...... عارفين هي ايه ؟؟؟ ان المواقف دي بتخليك تضحك من مرارة الحياة مش من حلاوة الموقف أو من كوميديا المفارقات زي ما بيقولوا ..... موقف زي اللي حصل فوق دة يخليك ما تضحكش دة يخليك تعيط المفروض على الرغم من المفارقة اللي فيه بس لو ركزت هتحس قد ايه حال الناس الكويسة بقى صعب ... ازاي سيطر الجهلة والمتحذلقون والمتفزلكون على أبواق الاعلام و بقى كلامهم ف كل واحد مغيب عن الواقع سواء بمزاجه أو غصب عنه المهم انه بيدعمهم وخلاص .....بالتالي لو فكرت تضحك هتحس انك انسان مش طبيعي .... لأن المرارة والقرف رد الفعل الطبيعي فيها هو الحزن والبكاء ... عشان كدة لو شوفت حد بيتحط ف المواقف اللي فيها ف المفارقات دي ومش بيضحك اعرف انه شايل كتير ..... معبي ... وفاضل عليه تكة ويفرقع أو ينطوي فاحذر انفجاره وارحم انطواءه ...... رمضان كريم