لما كنت صغير قضيت فترة طفولتي ف السعودية حبيت البلد دي مع إن البلد اللي كنا فيها مكانش فيها ترفيه أو متميزة بس كان مكان هادئ كل واحد بيعمل اللي عاوزه و براحته دة الحلو اللي كان ف المكان دة .... المهم ... ف اخر ليلة لينا ف السعودية بنلم حاجتنا وبنودع بقى الناس وكدة ... كان معايا ميدالية مفاتيح كان واحد صاحبي سعودي ادهالي هدية ... خفت أنساها حطيتها في جيب شنطة من الشنط بتاعتنا هاند باج وقولت لما نوصل مصر هبقى أطلعها ... المهم وصلنا مصر ... ووصلنا البيت ... إيه رأيك بفتح الشنطة ... مالقاش الخاتم .. قصدي الميدالية .... قلبت عليها الدنيا وزعلت جدا ... ازاي حاجة زي دي تحصل ... المشكلة هنا مع إني قلبت البيت عليها والشنط ساعتها ماخليتش حتة الا ما دورت فيها وبرضه مالقيتهاش ...الا اني كل ما أقرب من الشنطة دي على مدار عشرين سنة لازم أفتح الجيب اللي كنت حاطط فيه الميدالية دي وأدور عليها .... وكل مرة أدور يكون في أمل إني هلاقيها .... المهم هنا ان مهما كانت الحاجة صغيرة أو مش مهمة بس مرتبطة عندك بفترة ولو صغيرة من حياتك بتتمسك بيها لأبعد حد وبتزعل لو راحت أو ضاعت ... مش شرط تكون مرتبطة عندك بحاجة حلوة أو ذكرى جميلة لأ دة ممكن حتى تفكرك بأيام سواد بس بتخليها عشان تفتكر انك بطل ونجحت في انك تطلع من الايام دي كسبان أو ع الاقل مش خسران ... يا اما بتخليها عشان تفكرك انك غلطت وتتعلم من غلطك .... اوعى تنسى اي حاجة عدت عليك حلوة أو وحشة .... اوعى لما تتضايق تغيب مخك ... اللي بينسى ما بيتعلمش واللي مابيتعلمش مش بيعيش .... أنا عارف ان الكلام ممكن يكون سهل ومعروف بس الفكرة كلها ف التذكير .... وبعدين إذا كنت أنا وقعت ف الغلطة وكنت عارف الكلام دة .... يبقى اللي مش عارف يعمل إيه .... وادينا بنتعلم !!!
ليست هناك تعليقات:
إرسال تعليق