اللي يبص لحال الشعب المصري ف شهر زي رمضان دة يستغرب أشد الاستغراب ...... مش هقولك بقى جو ملائكي بينزل على الارض المصرية والجو الهلكان دة ... لأن كلنا عارفين ان الخناقات بتكتر ف رمضان ... والحوادث بتكتر ف رمضان .... ليه لأن احنا شعب بيموت ف انه يلاقي حاجة يعلق عليها مشاكله وفشله ....... بس احقاقا للحق يعني الخير اللي بيتعمل في رمضان الصراحة لا يجارى في مصر الناس بيكون عندها استعداد فظيع لكل أنواع الخير ... من مساعدة محتاجين ... لكساء الفقراء .... لإفطار صائمين ..... لكل أنواع الخير .... من كام يوم وانا راجع من الوحدة الصحية على الطريق ..... كنا داخلين على وقت الفطار .. انا عاوز أقولكم ان انا في خلال مسافة اربعين كيلو بالعربية مايكفي لاطعام ست أفراد .... ومش طفاسة مننا ... لا دة جبرا وقسرا .... لدرجة ان واحد رمى نفسه قدام العربية وعاوزنا نركن بالغصب وننزل نفطر وبعدبن نقوم نكل مشوارنا ....سبحانك يارب ... يا مقلب القلوب .... طيب السؤال هنا اللي بيطرح نفسه ... دلوقتي اللي بيعمل الموضوع دة ف مصر الفقراء والاغنياء على حد سواء ... مع اختلاف الوسائل .... من كيس عصير يتحدف ف العربية لمائدة رحمن ربنا يجعلها ف ميزان حسنات كل من عملها يارب .... طيب يعني الموضوع دة بتقوم بيه فئات المجتمع ..... طيب بما ان الفئات دي منها ناس بتوصل لمناصب عليا ف البلد ..... طبعا مش مش محتاجين نقول أصحاب المناصب ف مصر بيعملوا ايه ... إلا من رحم ربي طبعا .... الفكرة هنا بقى ايه السر في التحول السيكولوجي والايدولوجي لتلك الشخصيات اللي بيحولها من شخصيات متحبرة " زي نقطة الحبر كدة بتفرش حواليها وتكون مصدر خير للكل " الا شخصيات متجبرة .... عاوزين نعرف السر والسبب في زيادة النقطة ف متجبرة دي هل هو ان الكرسي مثلا بيكون في حشرات زي حشرات الفراش أول ما الواحد من دول بيقعد ع الكرسي بتدخل من الشرج وتنقل المخ حتة حتة من الجمجمة للمقعدة ؟؟؟؟ ولا مثلا بيجيب أكلان ف مايبقاش فاضي مثلا انه يفكر من كتر الهرش ؟؟؟؟ ولا مثلا هواء تكييف مكتب اصحاب المناصب دي فيه مواد بتغير التركيب الجيني لكل من تولى منصبا ..... النقطة كمان اللي تزودك حيرة على حيرتك ... لما الشعب طيب كدة وبيحب الخير ... ليه لما بيتسابله الحريات بتاعته بيلجأ للبلطجة .... ليه دايما بيسئ استغلال حرياته ؟؟؟؟ دة غير التميز بالسذاجة وعدم الرغبة ف التعلم لقطاع كبير من الناس !!!! بيطبقوا فعلا المثل القائل الجهل نعمة ..... دلوقتي بقى عندنا سؤالين ... فعلا شاغلني بقالي مدة ..... اللي يقدر يفكر معايا ويحاول يلاقي اجابة ياريت ... مش شرط نطبق الحل ... بس المهم نوصل لسبب المشكلة ونعرف الحل !!!
وللحوار بقية
احنا شعب عطاء فعلا مش فى رمضان بس لكن ديما فى ناس بتستغل طيبه المصرين
ردحذفوفى ناس مش لاقيه القمه تقوم تعمل اى حاجه وفى ناس طماعه عايزه تكوش على كل حاجه ودى حال الدنيا بس المهم انهو الى بيضغى على التانى الخير ولا الطمع هو ده السؤال الى عايزنله اجابه