الانسان اللي بيفكر صح هو اللي قبل ما ياخد قرار أو يطلع بنتيجة بعد تفكيره اللي يقف على مسافة واحدة من كل الاحتمالات عشان يعرف يقيم الموضوع أو الفكرة أو المشكلة بشكل صحيح بالتالي ما يفضلش احتمال على احتمال لأنه مثلا ميال الاحتمال دة أو اسهل أو أو ........
امبارح صدرت قرارات رئيس الجمهورية بإقالة المشير (احالته على المعاش) و كلبه المدلل سامي عنان وتعيينهم مستشارين دة غير قرار الغاء الاعلان الدستوري المكمل واسترداده لصلاحياته كاملة .....
طبعا حق الناس تختلف ف وجهات النظر وكل واحد ليه اسبابه بس الحلو هنا انهم انقسموا لفريقين ودة هيسهل علينا المقارنة يمكن نطلع بنتيجة ف الاخر
الفريق الاول : فريق شايف انها صفقة بكل المقاييس والمعايير وان مالهاش تفسير تاني غير كدة !!!!
الفريق التاني : فريق شايف انها ضربة ف مقتل للعسكر وان الريس كدة زي الفل ويحيا الريس وتحيا الثورة
هناخد الفريق الاول ونشوف ايه اسبابه :
الفريق الأول وجهة نظره ف ان دي مؤامرة وصفقة نظرا للتاريخ الاسود للاخوان على مدار حياتهم وعلى مدار السنة ونص اللي فاتوا اللي يعني كانوا يطفحوا منهم الدم ف الشوارع والاعتصامات ...... كانت الناس بتتفشخ ف وادي والاخوان بيطبلوا ويغنوا ف وادي تاني خالص !!!!! ...... مش هنحتاج نعدد لن لو عدينا يبقى مش هخلص كتابة الا السنة الجاية ..... طبعا وجهة النظر هنا ان الريس اتفق مع المشير طنطاوي وسامي عنان ف انهم يخلعوا من سكته لأنهم كدة كدة هيخلعوا سواء برضاهم اوغصب عنهم فتبقى برضاهم ويبقوا مستشارين وبرضه اسمه منصب عالي ف الدولة ولسة برضه ليكم قيمة وكدة !!! .... دة غير انه لو كان عاوز يضرهم كان حاكمهم وسجنهم وسحل عين أم اللي جابوهم مش يكرمهم ويديلهم قلادة النيل ويعينهم مستشارين !!!...... دة غير طبعا انهم متعودين من الاخوان على الخوازيق فأصبحوا يتبعون اسلوب التوقع التلقائي للخازوق حتى وان كان معمول (Hidden) !!!
الفريق التاني أسبابه كالتالي :
اولا ان دة كان حلم السنين ان طنطاوي وعنان يغوروا بقى خلي السكة تفضى ويسقط يسقط حكم العسكر (حتى لو فيهم اخوان كتير برضه بس هنمشيها ان الاخوان كانوا ضد العسكر السنة اللي فاتت!!!) تاني حاجة ان الريس ماشي ف مشروع ال 100 يوم اهو وابتدى حملة التطهير وان الكلاب دول فلول وياما سفكوا دماء وياما طلعوا عنين اهالينا ...... واهو اخدهم على خوانة ومحدش قدر يتكلم من هول الصدمة و أمرسي أجامد و حاسب لتشيل المرشد ف سكتك ... وحبوب الشجاعة اشتغلت ..... وايدلوا ياريس وكلام من القبيل دة ...... ثانيا الريس كدة ماكر وداهية لما عينهم مستشارين وادالهم قلادة النيل كدة هو بيلعب سياسة صح !!! حطهم تحت عينه وبقوا تحت حكمه !!! وبقوا ملزمين يقدموا تقارير صحيحة ....والا اتحاكموا بالخيانة ... مايقدروش يسيبوا البلد ودلوقتي أولا وأخيرا بقوا خاضعين لرئيس ديوان رئيس الجمهورية ..... يعني م الاخر باسهم وحطهم جنب الحيط !!!!
دي وجهة نظر الفريقين باختصار ..... المهم هنا ان في أحداث تمت قبل وبعد الكلام دة لو جينا نبص للي حصل ف الجيش المدة اللي فاتت ... بعد الفاجعة في أولادنا واخواتنا على الحدود اللي سبقونا على الجنة بإذن الله ايه اللي حصل القيادات طبعا زي أيام مبارك كانوا هيطرمخوا على اللي حصل وكان باين ف كلامهم .... بس طبعا سواء برضاه أو غصب عنه (وهنقول برضاه عشان الصح افتراض حسن النية ف الناس ) كان لازم يتخد قرارات تختلف عن مبارك على الاقل تبان فيها الثورية .... فتم التصديق على ان القوة الضاربة للجيش التاني الميداني اللي هو عصب جيش مصر تتحرك لسيناء في حملة واسعة ضد عناصر الفساد ...... ومعاهم رجالة حرس الحدود طبعا مصر مش حدودها بس مع اسرائيل في ليبيا والسودان ..... كدة يبقى المفروض الجيش التالت مع المنطقة المركزية والجنوبية والغربية والشمالية ي يقوموا بالمهمة دي مع رجالة حرس الحدود اللي فاضلين ..... كد المشير فاضل مين حواليه من الرجالة ؟؟؟؟ عندنا بتاع المخابرات الحربية ... ودة اتغير .... وبتاع الحرس الجمهوري ودة اتغير برضه ..... وبتاع الشرطة العسكرية ةدة اتغير برضه !!!! ........ يبقى كدة مشيرنا الهمام واقف بطوله ...... ماننساش ان في كلام اتقال اني ف انباء اتسربت عن ان المشير كان ناوي يخربها يوم 24 أغسطس وممكن كانت توصل لانقلاب ........ هنعدي الكلام دة لإن لانا ولاانتم نقدر نتأكد منه ..... بس هنسأل نفسنا كام سؤال ...... انا النهاردة مجتمع مع المشير الصبح وأغيره العصر ؟؟؟؟؟ طيب لو عينت وزير دفاع ايه اللي يخليني أجيب الراجل على ملا وشه واخليه يحلف اليمين قبل حتى مايلحق يعلق رتبه الجديدة .... واشمعنا العصار اللي فضل من بتوع المجلس العسكري وبقى مستشار وزير الدفاع لشئون التسليح ؟؟؟ وبأمر من الريس مش بترشيح من الوزير الجديد ؟؟؟؟ وليه ماشوفناش الفيديو بتاع تكريم المشير وعنان زي ماحصل مع الجنزوري .... واشمعنا قلادة النيل ؟؟؟ مش وسام الجمهورية من الطبقة الاولى ولا وسام الاستحقاق ؟؟؟؟ طبعا كل فريق من الفريقين اللي فوق دة لو مشينا بمنطقه ممكن نطلع الريس خاين وعميل ..... وومكن نطلعه لعيب وبيفهم سياسة .... عشان كدة انا مش هقولكوا انا بغلب أي فريق ...... بس هما كلمتين عاوز أقولهم ف الاخر وأجري على الله :
الناس اللي عمالة تقول انها اكيد صفقة وانها وانها .......
بصوا هي حاجة انا مقتنع بيها .... مش معنى اني معارضة يبقى أقف ضد النظام
ف كل خطوة يخطوها .... كلنا متفقين ان الخطوة كويسة على الاقل في ظاهرها
....... على الاقل ف الوقت الحاضر .... محدش يقدر يجزم انها صفقة أو مش
صفقة ..... هيبان ف الايام الجاية وساعتها لو طلعت فعلا صفقة احنا عارفين
هنعمل ايه ...... انما مانستبقش الاحداث ونقعد ننكد ونقفل على نفسنا
كفاية ان اكبر كلبين ف البلد بعد مبارك اتزاحوا من طريق الشرعية .... نقدر
نحط دستورنا ...معدناش خايفين ,,,و اي حد قادر انه ينزل ف الدورة الرئاسية
الجاية .... في الوقت دة المفروض نطالب بالافراج عن معتقلينا ....ندبس
الرئيس في انه يزود جرعة التطهير عشان حتى لو صفقة لا قدر الله يبقى يبتدي
يدخل في سكة يبقى الرجوع عنها صعب .... كل شوية نطلع بمطلب شعبي يزود جرعة
التطهير ... كدة تبقى معارضة صح بتبني ما بتهدش !!!!
والسلام ختام
قرارات الرئيس مرسي أنهت حكم العسكر وجعلت شمس الحرية تشرق على مصر لأول مرة منذ 60 سنة .
ردحذفالرئيس مرسي استعاد صلاحياته الداخلية، ومكانته الخارجية؛ فهذه المرة الأولى التي يتم فيها اختيار وزير الدفاع بقرار مصري خالص .
شكرًا للرئيس مرسي، ونحن لا نظن به إلا خيرًا إن شاء الله
ردحذففعلا .. آفة الرأي الهوى .. وطامة المعارض الكبرى أن يظل معارضا ؛ حتى للصواب من الرأي أو العمل ..
سلم القلم ، وبورك الكاتب ..
القرارات من رأيي الخاص كويسة جدا وبتمثل خطوات نحو دولة مدنية بعيدة عن حكم العسكر, لكن مازلت بعض التخوفات بشأن اللجنة التاسيسية للدستور وطريقة وكيفية تشكيلها ودستور مصر القادم هي ما يؤرقني, وأتمنى من الله أن يجعل من الرئيس مرسي رئيسا لكل المصريين, واحنا معاه ووراه في كل خطوة طالما رأينا أنها في صالح مصر ونحو دولة مدنية ديموقراطية متقدمة
ردحذف